Американскиот советник за национална безбедност, Џејк Саливан, изјави за Си-Ен-Ен дека приклучувањето на Украина во НАТО во овој момент „би значело војна со Русија“ и повика на претпазливост.
„Она што алијансата едногласно го кажа синоќа е дека се радуваме на иднината со Украина во НАТО. Ќе работиме со Украина на патот кон НАТО. Но, ние не сме подготвени да ја поканиме Украина денеска“, рече Саливан.
„Претседателот Зеленски очигледно имаше поинаков став за тоа. Но, претседателот Бајден ќе биде отворен со него денеска како што беше на секој телефонски разговор и средби кои ги имаа, и ќе ги презентира своите ставови и потоа внимателно ќе сослуша што има да каже претседателот Зеленски“, рече тој.
Запрашан за временската рамка за завршување на војната, тој рече дека ја разбира желбата на Украина да стане членка на НАТО „што е можно побрзо“, но рече дека ситуацијата е „динамична“.
„НАТО треба да може да одржува флексибилност – тесно да работи со Украина на нејзиното патување за да одлучи кога би имало смисла да ја прифати како членка“, рече тој.