Претседателката на Комисијата на Европската унија, Урсула фон дер Лејен, во понеделникот ја опиша одлуката на Русија да го суспендира договорот за извоз на жито од пристаништата на Црното Море како „циничен потег“ и додаде дека Европската унија ќе продолжи да работи за да обезбеди храна за сиромашните земји.
Неколку часа откако Москва ја обвини Украина за напад на Кримскиот мост, Русија соопшти дека го суспендирала учеството во историскиот договор со посредство на ОН за извоз на украинско жито преку Црното Море.
Русија за ова официјално ја извести Украина преку руската амбасада во Минск, изјави во понеделникот рускиот амбасадор во Белорусија.
Амбасадорот Борис Гризлов рече дека амбасадата испратила нота до Украина по дипломатски пат и дека договорот истекува на 18 јули.
Сепак, руското министерство за надворешни работи во соопштението рече дека земјата ќе биде подготвена да размисли за повторно приклучување кон црноморскиот договор за извоз на жито, доколку види „конкретни резултати“, но дека досега нејзините барања не се исполнети.
И покрај напорите на Обединетите нации да го продолжат договорот, пречките за рускиот извоз на храна и ѓубрива остануваат, додаде Русија.
„Само откако ќе добие конкретни резултати, а не ветувања и гаранции, Русија ќе биде подготвена да размисли за обновување на договорот“, се вели во соопштението.