Во средината на минатата година, амазонската прашума беше погодена од невидена суша. Реката Амазон падна на најниско ниво во последните 120 години, десетици делфини угинаа во езерото Тефе, а поради исушените водотеци, локалните заедници се соочија со неуспешна жетва и недостиг на вода за пиење и електрична енергија.
Студијата од јануари оваа година покажа дека климатските промени се одговорни за катастрофалната суша на Амазон.
Но, улогата на порастот на температурата во деградацијата на овој глобално важен екосистем не сопира со сушата. Топлото време во комбинација со дехидрираната вегетација создава поголем ризик од пожар.
Според сателитските снимки од националниот институт за вселенски истражувања ИНПЕ, во изминатиот месец, регистрирани се речиси 3.000 пожари во делови од бразилската прашума. Ова е највисока бројка забележана во текот на февруари од 1999 година, кога започна мониторингот.
Експертите исто така потврдуваат дека глобалното затоплување придонесе за соборување на февруарскиот рекорд.
„Климатскиот фактор секако игра фундаментална улога во оваа аномалија“, изјави за новинската агенција АФП Ане Аленкар, директорка за наука во истражувачкиот институт IPAM Amazonia.
Точниот број на регистрирани пожари во месецот зад нас е 2.940, што е за 67% повеќе во споредба со претходниот рекорд во февруари 2007 година, кога беа забележани 1.761 пожар. Ова е исто така четири пати повеќе пожари во Амазон во Бразил во споредба со истиот месец минатата година.
Најпогоден е северниот дел на прашумата, особено бразилската држава Рораима, каде што се наоѓа резерватот Јаномами, населен со домородни народи.
Како што горат пожарите, се ослободува јаглерод диоксид складиран во растенијата. Според Службата за климатски промени Коперник, февруари 2024 година запиша уште еден неславен наслов: проценетите просечни месечни штетни емисии (од 27 февруари), само во Рораима, изнесуваат 2,3 мегатони (2,3 милиони тони), што е најголема количина во последните дваесет -две години.
Околу 60% од дождовните шуми на Амазон е во Бразил. Но, огнените елементи беснееја во другите земји каде што се наоѓаат „белите дробови на светот“… На пример, штетните емисии предизвикани од февруарските пожари во Венецуела се проценуваат на 5,2 мегатони.
Амазонската прашума претставува еден од глобално важните центри на биолошката разновидност. Неговата ранливост на климатските промени, првенствено преку зголемениот ризик од пожар, го продлабочува постоечкиот проблем, па Амазон се трансформира од резервоар на јаглерод во емитер на овој гас кој ја загрева атмосферата.
Зачувувањето на природата е всушност уште еден мотив за борба против климатските промени, а воедно и важна алатка на тој фронт.