Американскиот советник за национална безбедност, Џејк Саливан рече дека администрацијата на претседателот Џо Бајден не го гледа убиството на Палестинците од страна на Израел во Газа во војната против Хамас како геноцид.
„Не веруваме дека тоа што се случува во Газа е геноцид. Одлучно и официјално ја отфрламе таа теза“, рече Саливан во разговор со новинарите во Белата куќа.
Тој изјави дека САД сакаат Хамас да биде поразен, дека Палестинците се фатени во средината на војната „во пеколот“ и дека големата израелска воена операција во Рафах би била грешка, пренесува „Гласот на Америка“.
Саливан го повтори ставот што Бајден го изрази во саботата дека ќе има прекин на огнот во Газа доколку Хамас ги ослободи заложниците.
„Светот треба да го повика Хамас да се врати на преговарачката маса и да го прифати договорот“, додаде американскиот претставник.
Тој додаде дека САД напорно работат на договор за прекин на огнот и ослободување на заложниците, но не може да предвиди дали и кога ќе биде постигнат договор.
Бајден, кој се кандидира за втор мандат оваа година, се соочи со силни критики од сопствените поддржувачи за неговата поддршка за Израел, при што некои критичари го обвинуваат Израел за геноцид.
Околу 300.000 од 1,3 милиони Палестинци кои избегаа во јужниот дел на Газа пред неколку месеци по наредба на израелската војска да ги избегнат нападите на милитантите на Хамас во северниот дел на Газа, сега добија наредба повторно да се преселат, овој пат северозападно од Рафа, во областа долж брегот на Средоземното Море во Газа, пренесува „Танјуг“.