Здравствените власти во индиската држава Керала издадоа предупредување откако 14-годишно момче почина од вирусот нипах, јави денеска Би-би-си. Според министерот за здравство, уште 60 лица се идентификувани како високоризична категорија за болеста.
Таа објасни дека момчето е од градот Пандикад и дека оние кои стапиле во контакт со него биле изолирани и тестирани.
Од луѓето во областа е побарано да преземат мерки на претпазливост, како што се носење маски во јавност и воздржување од посета на луѓе во болница.
Според Светската здравствена организација, инфекцијата со вирусот Нипах се пренесува од животни како свињи и лилјаци на луѓето.
Почетните симптоми може да вклучуваат треска, главоболка, болки во мускулите, повраќање и болки во грлото.
Кај некои луѓе, овие симптоми може да бидат придружени со вртоглавица и поспаност, променета свест, акутен енцефалитис, атипична пневмонија и други респираторни проблеми.
Во тешки случаи, инфекцијата со Нипах може да доведе до фатален енцефалитис – сериозна состојба која влијае на мозокот.
Стапката на смртност кај оние кои се заразени со вирусот е висока, бидејќи нема лек или вакцина.
Овој вирус може да се пренесе преку контаминирана храна и контакт со заразено лице.
Експертите велат дека поради загубата на живеалиштата, животните живеат поблиску до луѓето, што му помага на вирусот да премине од животните на луѓето.
Државната влада на Керала неодамна објави дека создава акционен план за да се спречи избувнувањето на Нипах.
Минатата година властите во државата затворија училишта и канцеларии откако потврдија пет случаи.