Термометрите во Медитеранот сè уште се вжештени. Сè поголем број туристи бегаат од жештините на јужна Европа и бараат одмор во земјите на северот на континентот.
Како што пишува „РТС“, за време на викендот термометрите во Рим измериле над 40 степени, а од горештините починале четири лица. Затоа за некои пренатрупаните медитерански плажи на кои им се заканува топлотен бран повеќе не се избор, туку „ладењето станува нов тренд на патување“. Земјите како Норвешка и Шведска промовираат „ладење“ за да привлечат посетители во нивната клима.
Во 2023 година, бројот на ноќевања во странство се зголеми за 22 отсто во Норвешка и 11 отсто во Шведска. Главниот град на Лапонија во северна Финска забележа скок од 29 отсто. Денес, многу луѓе претпочитаат да пливаат во езеро или фјорд или да ги полнат белите дробови со свеж воздух додека пешачат.
Истражувањето во Германија покажа дека двајца од пет луѓе планираат да ги променат своите навики за патување со тоа што ќе се одлучат за различни сезони или постудени дестинации.
Зголемен е и бројот на странски купувачи на викендички низ Шведска, а како главна причина се наведуваат климатските промени. Некои купувачи бараат домови за иднината кога Европа ќе стане премногу жешка.
Свои проблеми има и приливот на туристи.
„Нашата главна грижа е што имаме премногу луѓе во исто време“, вели поранешниот градоначалник на едно норвешко село каде што се закотви брод за крстарење со 6.000 патници и 2.000 членови на екипажот.
Фреквенцијата, интензитетот и времетраењето на топлотните бранови се зголемија од 1950 година, а особено во последните две и пол децении и ќе продолжат да се зголемуваат со глобалното затоплување.