Бројот на мултимилионери, поединци со богатство од 100 милиони долари или повеќе, во последната деценија нагло се зголеми за 54 проценти. Во светот има повеќе од 29.300 луѓе кои припаѓаат во оваа група, се вели во извештајот на инвестициската консултантска фирма „Henley & Partners“.
САД и Кина регистрираа најзначајни зголемувања кај оваа категорија богати луѓе.
Кина забележа неверојатни 108 отсто зголемување на центимилионери во текот на изминатите десет години, додека САД забележаа раст од 81 отсто.
Спротивно на тоа, Европа забележа скромно зголемување од 26 отсто во истиот период.
Листата на „Henley & Partners“ „Педесет најдобри градови за центимилионерите“ нагласува каде е концентрирана глобалната елита и каде се движи.
САД водат со 744 центимилионери во Њујорк, 675 во Сан Франциско и Силиконската долина и 496 во Лос Анџелес.
Во извештајот се истакнува дека САД поседуваат повеќе од 30 отсто од светското ликвидно инвестициско богатство, со вкупен имот кој изнесува 67 трилиони долари.
Сепак, оваа бројка може да се промени во зависност од исходот на претседателските избори во САД во ноември. Предложеното зголемување на даноците за милионерите, поддржано од потпретседателката Камала Харис, може да ги поттикне богатите да се преселат на друго место.
Има брз пораст на богатството во Азија, особено во градовите како Пекинг, кој сега има 347 центимилионери, по него е Сингапур со 336, Шангај со 322 и Хонг Конг со 320.
Во Европа, некогаш глобален финансиски центар, Лондон останува центар со 370 центимилионери и е на четвртото место на глобално ниво.