Google воведе нови правила за лозинка кои значително ќе влијаат на начинот на кој корисниците, особено оние што користат Google Workspace, пристапуваат до нивните сметки на Gmail.
Оваа промена е дел од пошироката стратегија на компанијата насочена кон подобрување на безбедноста и елиминирање на застарените методи за автентикација кои повеќе не обезбедуваат соодветно ниво на заштита. Целта е да се заштитат корисниците од се почестите закани во дигиталниот свет, особено од напади кои користат украдени податоци за најавување.
Една од најважните промени се однесува на отстранувањето на поддршката за апликации кои се потпираат на постари методи за автентикација, како што е онаа која бара само корисничко име и лозинка. Таквите апликации повеќе нема да имаат пристап до сметките на Gmail. Дополнително, Google Sync веќе нема да биде поддржан. Наместо оние помалку безбедни методи, сите апликации кои сакаат да пристапат до сметките на Gmail ќе мора да користат OAuth – понапреден и побезбеден метод за автентикација, кој овозможува дополнителни слоеви на заштита на податоците на корисниците.
Овие промени најмногу ќе влијаат на корисниците на пакетот Google Workspace, додека корисниците на стандардните сметки на Gmail ќе почувствуваат мали промени.
Со цел да се избегнат можни проблеми со пристапот до е-поштата, корисниците на Google Workspace треба веднаш да проверат неколку клучни работи:
* Корисници на Outlook – Ако користите Outlook 2016 или порано, ќе треба да ја надградите на Microsoft 365 или понова верзија на Outlook за сè уште да можете да пристапите до вашата сметка на Gmail.
* Корисници на Thunderbird и други мејл клиенти – Треба повторно да ја додадете вашата сметка на Google и да поставите IMAP со автентикација OAuth за да го задржите вашиот пристап безбеден.
* Корисници на апликации за iOS и macOS Mail – Мора да ја користите опцијата „Sign in with Google“ за да ја овозможите автентикацијата на OAuth и да обезбедите безбеден пристап до вашата сметка.
Овие промени доаѓаат во време кога истражувањата покажуваат дека голем број корисници сè уште користат застарени методи на заштита, како комбинација на корисничко име и лозинка, кои денес се многу подложни на злоупотреба. Според неодамнешното истражување на компанијата Yubico, повеќе од половина од корисниците веруваат дека таквиот метод е доволно безбеден, иако токму овој метод често е цел на хакерски напади.
Безбедносните експерти нагласуваат дека украдените податоци се една од најчестите причини за хакерски напади, поради што префрлањето на понапредни методи, како што е автентикацијата на OAuth, е клучен чекор во заштитата на корисниците во современиот дигитален свет.
Google ги воведува овие промени со цел да им обезбеди на своите корисници високо ниво на безбедност и заштита од сè пософистицирани закани на Интернет.