Германија и Турција постигнаа нови договори за депортации. Договорите се однесуваат на турски државјани на кои, на пример, германските власти им одбиле азил. Берлин сега очекува да се исполни договорот, според ДПА.
Германската влада е во постојан дијалог со Турција за миграциските прашања – „како и во областа на соработката за враќање (на луѓето)“, изјави портпаролот на Министерството за внатрешни работи.
Според информациите од петокот, Германија, наводно, веќе почнала да ги депортира турските државјани кои мора да ја напуштат земјата. За почеток, во Турција ќе се вратат вкупно 200 лица.
Мнозинството баратели на азил од Турција во Германија се Курди, покажуваат податоците на организацијата за помош на бегалците Pro Asyl.
Сепак, турскиот претседател Реџеп Таип Ердоган ги отфрли медиумските извештаи за масовни депортации.
Информативната администрација на Ердоган на платформата Х објави дека нема договор со германската влада за депортирање на 500 турски државјани секоја недела, како што тврдат некои медиуми.
Депортациите не беа ниту тема на неодамнешната средба меѓу Ердоган и германскиот канцелар Олаф Шолц во Њујорк, на маргините на неодамнешната седница на Генералното собрание на ОН, изјави портпаролот на турското МНР.
„Федералната влада интензивно разговара со земјите на потекло за подобрување на соработката на тема враќање“, изјави портпаролката на германската министерка за внатрешни работи, Ненси Фезер за ДПА како одговор на наводите од Анкара.
Турција е многу важен партнер во сите овие прашања. Сепак, „деталите од овие дискусии се доверливи“, рече портпаролот.
Според Берлин, враќањето на турските граѓани се одвива постепено со комерцијални летови. Веќе се направени првите враќања.
Депортациите беа проблем во кампањата во пресрет на неодамнешните регионални избори во Германија и сигурно ќе остане така додека се вжештува политичката битка за сојузните избори во 2025 година.
Шолц најави дека сака депортации „во големи размери“. Pro Asyl го критикуваше овој курс како „неодговорен“.
Владата во Анкара се соочува со критики за нејзиното досие за човекови права и грубиот третман на политичките противници.