Шон Диди Комбс се соочува со нови обвиненија за силување, сексуален напад и напад откако вчера беа поднесени најмалку шест нови тужби. Тужбите се поднесени до федералниот суд во Њујорк од две жени и четворица мажи. Обвиненијата опфаќаат настани кои наводно се случиле од 1995 до 2021 година, пишува Би-Би-Си. Обвинителите тврдат дека некои од нападите се случиле на забавите на Диди на кои присуствувале познати личности и музичари.
Адвокатите на раперот ги отфрлија обвиненијата. Во изјавата за Би-Би-Си, тие рекоа дека „Диди никогаш не злоставувал никого сексуално, ниту возрасни, ниту малолетници, ниту мажи, ниту жени“.
Еден од тужителите изјавил дека имал 16 години кога присуствувал на една од забавите во Хемптонс во 1998 година. Тој вели дека бил воодушевен кога ја добил поканата за забава на Диди. Тој вели дека таму видел многу познати личности и музичари. Тој и Комбс разговарале за музика, по што, според тужителот, отишле на поприватно место. Тој тврди дека Комбс за време на разговорот одеднаш му наредил да се соблече.
Втората тужба поднесена во понеделникот вклучува наводи од жена која тврди дека Диди ја силувал во хотелска соба во 2004 година, кога била 19-годишна студентка. Рекла дека раперот го запознала на снимање, а потоа тој ја поканил и нејзината пријателка на приватна забава во хотелот. Таа тврди дека по нејзиното пристигнување, Диди „ја пипкал, ја малтретирал и на крајот ја силувал“ без оглед на нејзините молби да престане.
Адвокатот од Тексас, Тони Базби, кој ги застапува тужителите, рече дека застапува повеќе од 100 луѓе кои планираат да го тужат раперот за сексуален напад, силување и сексуална експлоатација. Тој додаде дека некои од наводните жртви се деца.
„Ќе дозволиме наводите во поднесените тужби да зборуваат сами за себе и ќе работиме да видиме дали правдата е задоволена“, рече Базби по поднесувањето на тужбите во понеделникот. „Очекуваме да поднесеме уште многу обвиненија против г-дин Комбс во следните неколку недели додека продолжуваме да собираме докази и да подготвуваме документи“, додаде тој.
Судењето на Диди е закажано за 5 мај 2025 година. Раперот ќе остане во притвор до судењето. Неговиот адвокатски тим, всушност, неодамна по третпат побара право на кауција, но судијата го одби.