Работата на метрото во Атина накратко беше нарушена, а зградата на Апелациониот суд е евакуирана, поради тројна закана за бомба која утрово беше испратена до властите.
Во 7:20 часот по локално време полицијата примила електронска пошта напишана на англиски јазик, во која се тврди дека биле поставени експлозивни направи на клиниката за трауматологија КАТ, во северното атинско предградие Маруси и во зградата на Апелациониот суд, како и на метро станицата Синтагма во центарот на Атина, пренесува Екатимерини.
Експертите за отстранување бомби биле распоредени на сите три локации и утврдиле дека заканата е измама, а одделот за сајбер криминал на полицијата продолжил да го истражува потеклото на мејлот, пишува грчкиот портал.
Апелациониот суд во Атина беше евакуиран како мерка на претпазливост, додека на возовите им беше наредено да не застануваат на станицата Синтагма, која беше привремено затворена.
Полицијата подоцна соопшти дека сообраќајот на метрото е нормализиран.