Една од главните причини за исчезнувањето на Амазонската прашума е сточарството: секоја година губиме стотици илјади хектари од овој клучен глобален јаглероден мијалник за сточарството.
Но, таквите штетни практики на месната индустрија имаат цена: бразилската агенција за животна средина IBAMA издаде казни од 64 милиони долари за одгледување или купување стока од незаконски уништениот Амазон.
IBAMA соопшти дека открила 69 фарми кои продале 18.000 грла собрани на расчистено земјиште, како и 23 компании за пакување месо кои купувале говеда од државите Бразил, Пара и Амазонас.
Со следење на синџирот што произведува или продава добиток од навлезени површини, се прават напори да се спречи уништувањето на шумите на Амазон.
На листата на казнети се најде и најголемиот светски играч во областа на преработката на месо, мултинационална компанија од Бразил – JBS. Тие веќе имаат платено слични казни во минатото.
Но, и покрај ова, според анализата од 2019 година во која учествуваше британски Гардијан, компанијата продолжи со оваа практика, игнорирајќи го договорот потпишан десет години претходно, во кој се обврза да купува добиток исклучиво од фарми кои не придонесуваат за незаконско уништување на дождовните шуми на Амазон.
JBS ги отфрли обвинувањата за набавка на добиток од имотите на црната листа.
„Ниту едно од купувањата на JBS, идентификувани од IBAMA, не се направени од области под ембарго“, се вели во соопштението на компанијата.
JBS додава дека нивниот систем за геопросторен мониторинг гарантира дека животните не се купуваат од зоните за заштита на животната средина, како и од фарми кои се вклучени во нелегална сеча или инвазија на териториите на домородните заедници.
Покрај JBS, голем број производители на месо уште во 2013 година им ветија на обвинителите дека нема да набавуваат добиток од ранчи кои се наоѓаат на незаконски расчистено земјиште или се поврзани со други еколошки злосторства. Згора на тоа, десетина големи компании – вклучително и JBS – ветија дека ќе го елиминираат уништувањето на шумите од нивниот синџир на снабдување до 2025 година, што исто така важи и за индиректните добавувачи, односно оние кои продаваат на посредници.
Речиси 80% од дождовните шуми на Амазон кои исчезнаа помеѓу 1996 и 2006 година беа искористени за пасење добиток. Во текот на таа деценија, повеќе од десет милиони хектари од Амазон, што е еквивалентно на површината на Исланд, беа исчистени, што помогна Бразил да стане најголем извозник на говедско месо во светот, според извештајот.
Неодамнешните казни ги истакнуваат финансиските ризици со кои месната индустрија може да се соочи ако ја игнорира одржливоста во своето работење, што ги натера компаниите да разгледаат одблизу кој и каде купува добиток.