Трговскиот суфицит на Германија се намали во септември од 21,4 милијарди евра во август на 17 милијарди евра, објави германската Федерална статистичка служба (Дестатис).
Сезонската и календарски приспособената вредност на германскиот извоз во септември изнесува 128,2 милијарди евра, што е за 1,7 отсто помалку во споредба со август и 0,2 отсто помалку во однос на септември 2023 година.
Месечните испораки на германска стока во земјите од Европската унија се намалени за 1,6 отсто, извозот во Кина за 3,7 отсто, а извозот во Велика Британија за 4,9 отсто.
Спротивно на тоа, извозот во Соединетите Американски Држави се зголеми месечно за 4,8 отсто, како и извозот во Русија за 3,6 отсто.
Вредноста на германскиот увоз во септември изнесува 111,3 милијарди евра, што е за 2,1 отсто повеќе во однос на август и 1,3 отсто повеќе во однос на истиот месец лани, пренесува Танјуг.
Увозот од земјите на Европската унија се зголеми месечно за 1,6 отсто, исто како и увозот од земјите кои не се членки на ЕУ за 2,6 отсто, особено од Кина за 5,6 отсто и од Русија за 20,1 отсто.
Трговскиот суфицит на Германија за првите девет месеци од 2024 година изнесува 186,9 милијарди евра, според веб-страницата Дестатис.