Грција ќе ја поддржи Албанија во нејзината децениска кандидатура за влез во Европската унија под услов да ги почитува правата на нејзиното етничко малцинство, изјави денеска грчкиот премиер Киријакос Мицотакис.
Говорејќи на потпишувањето на договорот за изградба на нов пат што го поврзува градот Јанина во северозападна Грција со албанското село Какавија, Мицотакис рече дека Грција отсекогаш се залагала за добри односи со својот јадрански сосед, пренесе Ројтерс.
Но, нејзината поддршка за кандидатурата на Албанија за пристап во ЕУ зависи од тоа колку брзо ќе ги исполни обврските во врска со имотот и другите права на најголемото етничко грчко малцинство во земјата, објави агенцијата.
„Постои континуиран пат на условување кон Европската унија каде што ние во суштина сме регулатори на брзината со која Албанија ќе се движи кон Европа“, рече Мицотакис пред да отпатува за Брисел на самитот ЕУ-Западен Балкан.
Врските меѓу Атина и Тирана се влошија откако Албанија го уапси етничкиот грчки политичар Фредис Белерис за време на изборната кампања за градоначалник во неговиот роден град Химаре минатата година и го затвори под обвинение за купување гласови.
Белерис беше ослободен оваа година откако освои место во Европскиот парламент како кандидат за конзервативната партија Нова демократија на Мицотакис.