„Туркиш ерлајнс“ објави дека одлучила да не превезува ирански и израелски државјани на летовите за Сирија.
Изјавата на компанијата дојде набргу откако „Туркиш ерлајнс“ објави дека ќе ги обнови летовите до сирискиот главен град Дамаск почнувајќи од следната недела, што ќе биде прв лет на компанијата до земјата по 14 години.
Извршниот директор на компанијата, Билал Екси рече дека компанијата ќе има летови три пати неделно, почнувајќи од 23-ти јануари.
„Се враќаме во Дамаск“, рече Екси.
Сепак, беше наведено дека на овие летови ќе важат посебни правила.
„Во согласност со неодамнешните одлуки на властите во Сирија, воспоставени се одредени правила за патниците кои влегуваат во Сирија. На граѓаните на сите земји, освен Израел и Иран, им е дозволен влез во земјата“, соопшти компанијата.
Либанските граѓани, пак, ќе можат да влезат во земјата доколку нивните родители се сириски државјани.
„Медиумите и новинарите генерално подлежат на посебни дозволи за влез“, посочуваат од авиокомпанијата.