Албанските гангстери ја искористија социјалната мрежа „TikTok“ за да понудат награда од 10.000 фунти на секој што ќе обезбеди информации за нивните „непријатели“ кои извршиле упад на фарма со канабис.
Бандата, со седиште во Лондон, покренала налог за пронаоѓање на крадците кои упаднале во нивната фарма со канабис.
Во една објава се бара помош за идентификување на група од пет мажи со качулки кои упаднале во фарма со канабис, заедно со придружното видео кое го прикажува моментот кога тие ја пробиле влезната врата.
„Секој што има информации за нив ќе добие 10.000 фунти. Ова е во северозападен Лондон“, се вели во објавата, а под видеото има крвожедни закани за „уличната правда“ што ќе се случи кога ќе бидат пронајдени.
„Ако ги најдете, отсечете им ги рацете и нозете. Одмаздата ќе ги снајде кога ќе се вратат во Албанија“, се вели во еден коментар.
„Вашите роднини, знаејќи што има во куќата, им ги продадоа податоците на овие луѓе“, се тврди во друг коментар, алудирајќи на тоа дека ги известил некој што е со нив или работи за нив, пишува „dailymail.co.uk“.
Албанските банди го зголемија своето влијание на пазарот на канабис во Обединетото Кралство, при што некои отворено се рекламираат на „TikTok“ како „градинари“ на нивните „фарми“.
Канабисот е најчесто користената нелегална дрога во Велика Британија, а минатата година го користеле околу 2,5 милиони луѓе на возраст до 59 и повеќе години во Англија и Велс, според Канцеларијата за национална статистика.
Истражувањето на Националната агенција за криминал покажа дека албанските организирани криминални групи го контролираат пазарот на кокаин во главните урбани и приградски области на Велика Британија (со исклучок на Мерзисајд).
Сепак, драматичниот пад на бројот на Албанци кои илегално ја минуваат границата, предизвика криза за „работници“, а рекламите што се појавија на „TikTok“ минатата година покажуваат дека шефовите на банди нудат дури 30 отсто од профитот на работниците кои живеат на фарми за канабис.
Неизбежно, албанските гангстери беа вклучени во насилството предизвикано од конфликтите со дрога на британска територија.