Мексиканската претседателка Клаудија Шејнбаум испрати писмо до Google со барање да ја преиспита својата одлука за преименување на Мексиканскиот залив.
Американскиот претседател Доналд Трамп потпиша извршна наредба за официјално преименување во Заливот на Америка, кој граничи со САД, Куба и Мексико. На Google Maps, новото име ќе биде видливо само за корисниците во САД, додека ќе остане непроменето во остатокот од светот.
Меѓутоа, Мексико тврди дека САД немаат правна основа за промена на името, бидејќи според Конвенцијата на ОН за поморско право, суверената територија на една држава се протега на само 22,2 километри од брегот.
„Оваа промена може да се однесува само на 22,2 километри од брегот на САД“, рече Шејнбаум. Google сè уште не го коментирал барањето на Би-Би-Си, но објави на социјалните мрежи: „Имаме долгогодишна практика да ги ажурираме имињата кога тие официјално се менуваат од владите“.
Оттаму, исто така, најавија дека планината Денали во САД ќе се преименува во планината Мекинли, во согласност со друга одлука на Трамп.
Шејнбаум ја критикуваше одлуката на Google, нагласувајќи дека компанијата не треба да го менува името на меѓународното море на барање на некоја држава. Сепак, таа се пошегува со потегот на Трамп, сугерирајќи дека Мексико може да побара дополнително преименување.
Таа претходно иронично предложи да се преименува Северна Америка во „Аmérica Mexicana“.