Речиси 100 новинари и други членови на граѓанското општество кои користат WhatsApp беа цел на шпионски софтвер во сопственост на Paragon Solutions, израелски производител на хакерски софтвер.
WhatsApp верува дека уредите биле заразени преку злонамерна PDF-датотека, испратена до поединци кои биле додадени во групни разговори.
WhatsApp е прилично сигурен дека тие 90 корисници биле цел и „можно компромитирани“. Жртвите биле предупредени за можен упад во нивните уреди.
WhatsApp побара од Paragon да престане со контроверзните активности. Наводните напади беа запрени во декември. Сè уште не е јасно колку долго целите можеби биле под закана.
Исто така, не е јасно кој стои зад нападот. Како и другите производители на шпионски софтвер, хакерскиот софтвер на Paragon се користи од владини агенции и институции. WhatsApp не можеше да ги идентификува во конкретниот случај. Тие одбија да ги именуваат земјите во кои се наоѓаат жртвите на нападите.
Експертите велат дека тоа бил напад со „нула клик“, што значи дека целите не морале да кликнат на малициозни линкови за да бидат заразени.
Бајден го ограничи, Трамп не го укина
Paragon се најде под повнимателна контрола откако магазинот „Wired“ објави во октомври дека обезбедил договор од 2 милиони долари со истражниот оддел на Имиграцијата и царината на САД.
Одделот, наводно, издал наредба за стопирање на активностите на договорот за да се потврди усогласеноста со извршната наредба од администрацијата на тогашниот претседател Џо Бајден, која на федералната влада и ја ограничила употребата на шпионски софтвер.
Администрацијата на претседателот Доналд Трамп отповика десетици извршни наредби од администрацијата на Бајден во првите две недели на функцијата, но наредбата од 2023 година за забрана на употреба на шпионски софтвер што претставува ризик за националната безбедност останува на сила.
Според „Гардијан“, Paragon има 35 владини клиенти, сите демократски држави. Тие, наводно, не соработуваат со земји кои претходно биле обвинети за злоупотреба на шпионски софтвер, како што се Грција, Полска, Унгарија, Мексико и Индија.
Шпионскиот софтвер на Paragon е познат како Graphite и има способности споредливи со шпионскиот софтвер Pegasus на NSO Group. Уредот заразен со Graphite им дава на напаѓачите целосен пристап до телефонот, вклучително и можност за читање пораки испратени преку шифрирани апликации како WhatsApp и Signal.
Компанијата, основана од поранешниот израелски премиер Ехуд Барак, неодамна беше предмет на медиумско покривање во Израел, откако беше објавено дека групата била продадена на американската приватна компанија AE Industrial Partners за 900 милиони американски долари. Извештаите сугерираат дека договорот сè уште нема добиено целосно регулаторно одобрение во Израел, со кое управува Министерството за одбрана на земјата.