Израелскиот министер за одбрана Израел Кац денеска се закани со враќање на воените дејствија доколку палестинското исламистичко движење Хамас до сабота не ги ослободи заложниците киднапирани во Израел и задржани во Појасот Газа.
-Ако Хамас не ги ослободи израелските заложници до сабота, вратите на пеколот ќе се отворат, како што вети американскиот претседател (Доналд Трамп)“, изјави Кац по состанокот со военото раководство.
Тој додаде дека продолжувањето на воените операции во Појасот Газа ќе биде со поинаков интензитет од претходните и дека ќе овозможи примена на планот на Трамп.
Кац алудираше на планот на американскиот претседател за ставање на Појасот Газа под контрола на САД и преселување на палестинското население во Египет и Јордан.
Кревкиот прекин на огнот меѓу Израел и Хамас е во сила од 19 јануари, додека палестинска група соопшти дека нема да попушти пред заканите на Израел и САД.