Русија не разгледува никакви опции за распоредување европски мировни сили во Украина, изјави рускиот министер за надворешни работи, Сергеј Лавров, на прес-конференција по посетата на Катар.
Тој потсети дека американскиот претседател Доналд Трамп „изјави дека одлуката за распоредување мировни сили е можна само со согласност на двете страни“.
„Тој очигледно мисли за нас и Украина. Никој ништо не не прашува за тоа“, истакна шефот на руската дипломатија.
Лавров оцени дека пристапот што го наметнуваат Европејците, конкретно Франција и Обединетото Кралство, е насочен кон дополнително ескалирање на конфликтот и спречување на какви било обиди за негово смирување.
„Францускиот претседател Емануел Макрон во Вашингтон ја истакна потребата од итен прекин на огнот, распоредување на овие мировни сили, а потоа, како што вели, ќе разговараме за териториите, судбината на луѓето и другите принципи на решавање. Тоа е паметно. Не можеме да се согласиме на договор кој има за цел да постигне една единствена цел – да ја вооружиме Украина уште еднаш“, нагласи министерот.
Тој ја отфрли и можноста за замрзнување на конфликтот во Украина долж контактната линија.
Како што рече, европските земји ја охрабруваат Украина да продолжи со конфликтот.
„Кога ќе се промени распределбата на политичките сили во истата Украина, што беше видливо за време на гласањето во Обединетите нации, Европа веднаш се обидува да го поткопа тој тренд, најавува нови големи пакети воена помош за Киев, го поттикнува да продолжи да се бори, директно наведувајќи дека во таа ситуација мирот е полош за Украина од војната, како што ми се чини дека направи данската премиерка Мете Фредериксен“, истакнува Лавров.
Тој исто така нагласува дека Москва не ги блокира преговорите за Украина.
„Чекаме нашите европски колеги да престанат да лажат дека Русија ги блокира преговорите. Претседателот Владимир Путин постојано одговора на овие лажни обвинувања, потсетувајќи дека, пред сè, украинското раководство, охрабрено од Европа, одбива преговори“, додава Лавров.
Дипломатот го насочи и вниманието на изјавите на европските политичари дека конфликтот во Украина „треба да се реши воено, а не на преговарачка маса“.
„Во таков воинствен дух, европските земји сега ја промовираат својата и онака безнадежно застарена и неуспешна политика кон Украина. Претпоставуваме дека најдобрата помош доаѓа од оние кои искрено сакаат да придонесат за решавање на конфликтот – разбирање на неговите основни причини, како што неодамна направи американскиот претседател Доналд Трамп“, додаде Лавров.
Шефот на руската дипломатија во вторникот вечерта пристигна во Катар. Тој денеска во Доха се сретна со емирот на Катар, шеикот Тамим бин Хамад ал Тани, пренесува Спутник.
Пред тоа тој ги посети Турција и Иран.