Русија побара итна седница на Советот за безбедност на Обединетите нации поради ситуацијата во Босна и Херцеговина, пренесува дописникот на Ал „Џезира“ од Вашингтон, Ивица Пуљиќ.
„Ова е многу важен потег на руската мисија во ОН“, рече Пуљиќ, додавајќи дека се работи за затворена седница.
Кризата во Босна и Херцеговина се влоши по неправосилното осудување на Милорад Додик, претседателот на босанскиот ентитет Република Српска, минатата недела.
Додик во прв степен беше осуден на една година затвор и шест години суспензија од политичката функција поради неприменување на одлуките донесени од високиот претставник на меѓународната заедница за Босна и Херцеговина, Кристијан Шмит.
Ова предизвика бурни реакции во РС, чие Народно собрание потоа усвои низа закони со кои им забранува на државните безбедносни и судски институции да работат на територијата на тој ентитет, вклучувајќи го Државниот суд на БиХ, Обвинителството на БиХ, Агенцијата за истрага и заштита (СИПА) и Високиот судски и обвинителски совет.
Овие закони, за кои опозицијата вели дека би можеле да ја турнат РС подлабоко во криза, сега ги решава Советот на народите на РС.
Како одговор на пресудата, Додик најавува и промени во Уставот на ентитетот на РС.
Можноста Советот за безбедност на Обединетите нации да расправа за ситуацијата во Босна и Херцеговина прв ја спомена српскиот претседател Александар Вучиќ, кој минатата среда го посети Додик во Бања Лука истиот ден кога му беше изречена пресудата.