Мисијата ЕУФОР-Алтеа во Босна и Херцеговина ќе биде зголемена за 400 војници, дознава „Кликс.ба“. Покрај зголемениот број војници, во БиХ пристигнуваат и четири нови хеликоптери.
Се размислува за зголемување на мисијата ЕУФОР поради моменталната состојба во Босна и Херцеговина.
Од 400 нови војници на ЕУФОР, 120 ќе дојдат од Унгарија, Романија и Бугарија, додека останатите ќе бидат војници од Словенија.
Новите сили на ЕУФОР во БиХ треба да пристигнат на 12-ти или 13-ти март или следната недела.
„Да потсетиме, неколку државни функционери побараа реакција од ЕУФОР, како гарант за воено спроведување на Дејтонскиот мировен договор, на неуставните потези на властите во Република Српска.
Ситуацијата дополнително ескалира кога вработените во СИПА во регионалната канцеларија на оваа државна агенција во Бања Лука денеска ги напуштија своите работни места по барање на МВР на РС.
Исто така, треба да се забележи дека нова криза во БиХ се случи откако претседателот на РС, Милорад Додик, потпиша укази за прогласување на неуставни закони со кои ќе се забрани работата на државните институции на територијата на овој ентитет“, пишува „Кликс.ба“.
Додик побара од ЕУФОР „да ги запре лицата од Федерацијата кои се упатуваат кон територијата на РС“, а раководството на силите на ЕУ во БиХ не ја коментираше оваа ситуација.