Поларизирачкиот концепт Type 00 на Jaguar неочекувано се појави на улиците на Париз, каде што привлече внимание со својот дизајн и новата боја, а ова беше и прв пат да се движи користејќи сопствена погонска единица. Во меѓувреме, извршниот директор на Jaguar, Раудон Гловер, откри детали за претстојниот електричен GT со четири врати, кој треба да се појави кон крајот на 2025 година.
Концептот со две врати се појави во нова боја наречена Француска ултрамарин, што е целосен контраст со светлата розова Мајами боја и понежната лондонска сина видена претходно. Прототипот ги задржа сребрените детали на долниот дел од каросеријата и истите тркала, зачувувајќи ја драматичната естетика која предизвика дебата откако беше претставен концептот.
Jaguar Type 00 внимателно се возел низ јавните улици пред да застане пред местото каде што се одржува Париската модна недела. Вратата „пеперутка“ полека се отвори, по што од совозачкото седиште излезе ирскиот актер Бери Кеоган. Потоа ја извадил јакната од футуристичкиот багажник.
Присуството на Кеоган дополнително го привлече вниманието на Jaguar, бидејќи актерот подоцна позираше на возачкото седиште, дополнително истакнувајќи ја внатрешноста со две седишта.
Непосредно пред дебито на концептот Type 00 во Париз, извршниот директор на Jaguar, Радон Гловер, сподели нови сознанија со Autocar за серискиот модел, кој ќе го земе дизајнот на концептот Type 00 и ќе го користи во форма на суперлуксузна лимузина со четири врати.
Гловер потврди дека претстојниот GT со четири врати ќе го задржи радикалниот дизајн на концептот. Тој додаде дека дизајнерите и инженерите на Jaguar работеле заедно за да се осигураат дека обликот на електричниот автомобил нема да ја загрози безбедноста, перформансите или аеродинамиката. Неодамнешните шпионски фотографии покажуваат дека серискиот модел ќе има долга хауба, тенки LED фарови, спортска линија на покривот и широк став.
Внатрешноста е повеќе фокусирана на „дизајн, изработка и инженерство, наместо на чиста технологија“. Целта беше да се создаде „неверојатно место за да се биде“, притоа задржувајќи ја технологијата „таму кога ви е потребна“.
Сите идни модели на Jaguar ќе ја користат новата платформа Jaguar Electric Architecture, која е исклучиво дизајнирана за електрични возила. Електричните мотори и батериите ќе бидат споделени со други модели од JRL, но ќе бидат комбинирани со уникатен дизајн и поставки на шасијата. Серискиот GT треба да има автономија до 692 километри и да испорачува 1.000 КС во најмоќната верзија.
Гловер откри дека неговиот тим поминал денови зад воланот на „најдобрите Jaguar возила на сите времиња“ барајќи инспирација за „фино дотерување“ на новиот електричен погон. Целта беше да се создаде автомобил кој може да се вози долги временски периоди без замор. Тој вети дека претстојниот болид ќе го донесе најдоброто што Jaguar може да го понуди.
„Големиот газда“ го возеше и прототипот GT, кој достигна брзина од 258 km/h, а беше импресиониран од неговата брзина, забрзување, перформанси и карактер.
По дебито на GT со четири врати оваа година, Jaguar ќе ја прошири својата понуда со два нови модели, кои се очекува да бидат луксузна лимузина и SUV.
Гловер нагласи дека Jaguar ќе се држи до својата одлука да остане целосно електричен бренд.