Претседателот на Соединетите Американски Држави, Доналд Трамп, објави дека наскоро ќе биде потпишан „одличен трговски договор“ со, како што изјави, „голема и високо почитувана земја“, но не даде дополнителни детали.
Трамп ќе го презентира договорот на прес-конференција во 10 часот наутро по локално време во Вашингтон, објави Би-Би-Си. Неколку американски и британски медиуми, повикувајќи се на извори блиски до преговорите, изјавија дека објавениот договор се однесува на трговски договор меѓу САД и Обединетото Кралство. Администрацијата на Трамп, исто така, води интензивни преговори за склучување трговски договори со Индија, Израел, Јапонија, Јужна Кореја и Виетнам, како дел од пошироката стратегија за промена на глобалниот трговски систем.
Паралелно, Трамп воведе нови царини за кинески стоки до 145 проценти, додека Пекинг одговори со контрамерки од 125 проценти за одредени американски производи, пренесува Танјуг.
Високи трговски претставници од САД и Кина ќе се сретнат во Швајцарија од 9 до 12 мај, што ќе биде првата средба на високо ниво меѓу двете земји по инаугурацијата на Трамп. САД ќе бидат претставувани од секретарот за финансии Скот Бесант и трговскиот претставник Џејмисон Грир, додека Кина ќе биде претставена од вицепремиерот Хе Лифенг.
Трговски договор меѓу Велика Британија и Индија беше потврден и оваа недела, со кој се олеснува извозот на британски виски, автомобили и други производи, а воедно се намалуваат царините за индискиот текстил и обувки.