Европската централна банка (ЕЦБ) се надева дека сите политички одлуки потребни за започнување на издавањето на дигиталното евро ќе бидат донесени до почетокот на следната година, по што ќе бидат потребни уште две до три години за оваа валута да заживее и да стане достапна за корисниците, изјави во четврток членот на Управниот совет на ЕЦБ, Пјеро Чиполоне.
ЕЦБ со години работи на воведување на дигитална верзија на еврото, но напредокот е многу побавен од очекуваното, главно затоа што сè уште не постои законска рамка што би ѝ овозможила на ЕЦБ да преземе поконкретни чекори кон реализација на тој проект.
Финансиската нестабилност по инаугурацијата на американскиот претседател Доналд Трамп во јануари оваа година дополнително ја зголеми итноста за преземање мерки, со оглед на тоа што Европа се потпира на големите американски компании за обработка на повеќето дигитални трансакции – што би можело да претставува сериозна ранливост за финансискиот систем.
„Се надевам дека сè ќе биде завршено до почетокот на следната година, и тоа многу рано… Потребно е да се усвои законската рамка, а потоа две до три години ќе бидат доволни за лансирање на дигиталното евро“, рече Чиполоне на конференција, одговарајќи на прашање за временската рамка за усвојување на потребните прописи.
За разлика од плаќањата преку кредитни картички како што се Visa или Mastercard, корисниците што ја користат дигиталната валута би имале директни побарувања против централната банка на еврозоната, а нивните средства би биле функционално и безбедно слични на готовината. Ова би им овозможило на граѓаните да вршат директни плаќања, и преку интернет и на физички продажни места.
Чиполоне додаде дека клучната пречка е постигнувањето политички договор меѓу сите земји-членки на ЕУ, но дека верува дека тоа може да се постигне „пред летото“. Сепак, законодавните процедури во Европскиот парламент би можеле да траат подолго, додаде тој. На прашањето дали Трамп и неговите потези би можеле да го забрзаат процесот на воведување на дигитално евро, гувернерот на Централната банка на Франција, Франсоа Вилерој де Гало, рече дека Трамп „ја зајакнал решителноста на ЕЦБ“ да продолжи со развојот на дигиталната валута.
Чиполоне уште во јануари изјави дека брзото воведување на дигиталното евро е неопходно, како одговор на промоцијата на Трамп на таканаречената валута „Stablecoin“ – видови криптовалути кои се врзани за американскиот долар, што во теорија ги прави постабилни од класичните крипто инвестиции. ЕЦБ смета дека популарноста на ваквите средства за плаќање би можела да предизвика повлекување на пари од традиционалниот банкарски систем, што потенцијално би можело да ја загрози стабилноста на европскиот финансиски систем.
Дигиталното евро би функционирало како електронски паричник, гарантиран од ЕЦБ, но управуван од комерцијалните банки. За користење на дигиталното евро нема да биде потребна банкарска сметка, но износот што граѓаните можат да го поседуваат во дигитална форма веројатно би бил ограничен на неколку илјади евра.