Портпаролот на Кремљ, Дмитриј Песков, изјави дека Украина ќе мора да ја разбере и прифати новата реалност, иако Киев сè уште не ја разбира целосно.
„Украина сигурно ќе мора да разбере дека ситуацијата се променила во споредба со она што беше пред три години“, рече Песков, додавајќи дека Киев ќе мора да ја прифати оваа нова реалност, објави агенцијата ТАСС.
Во исто време, тој изрази надеж дека работата на преговарачите ќе продолжи и дека страните ќе постигнат договор за трета рунда разговори.
Рускиот функционер рече дека Украина барем може внимателно да го прочита текстот на меморандумот што ѝ го предаде руската страна, бидејќи тој ги содржи сите овие нови реалности, објави руската агенција.
Средбата Путин, Трамп и Зеленски ќе биде резултат на долги подготовки
Средбата меѓу рускиот претседател Владимир Путин, американскиот претседател Доналд Трамп и украинскиот претседател Володимир Зеленски треба да биде резултат на долги подготовки, изјави денес портпаролот на Кремљ, Дмитриј Песков.
Песков во интервју за РБК на маргините на Меѓународниот економски форум во Санкт Петербург изјави дека таков состанок на највисоко ниво треба да биде резултат на долгорочна работа и резултат на веќе подготвен терен.
Портпаролот на Кремљ, исто така, нагласи дека Путин високо ја цени подготвеноста на Трамп да помогне во решавањето на конфликтот во Украина и ги смета напорите што тој лично и членовите на неговиот тим ги вложуваат за постигнување на оваа цел за многу важни.
Меѓународниот економски форум во Санкт Петербург се одржува од 18 до 21 јуни.