Израелскиот премиер Бенјамин Нетанјаху денес изјави дека промената или падот на раководството на Иран не е целта на нападите на Израел врз земјата, туку дека тоа може да биде резултат.
„Прашањето за промена на режимот или падот на овој режим е првенствено прашање на иранскиот народ. Нема замена за ова. И затоа не го претставив како цел. Може да биде резултат, но тоа не е декларирана или формална цел што ја имаме“, рече Нетанјаху во интервју за израелската јавна телевизија Кан, пренесува Ројтерс.
Кога беше прашан дали Израел може да го онеспособи иранскиот објект за збогатување ураниум Фордоу без помош од САД, Нетанјаху рече дека Израел „има моќ“ да ги елиминира сите свои цели и дека од американскиот претседател Доналд Трамп зависи дали сака да му се придружи на Израел во нападите врз Иран или не.
„Тој ќе го направи она што е добро за САД, а јас ќе го направам она што е добро за Државата Израел и морам да кажам дека до овој момент, секој го прави својот дел“, рече Нетанјаху. Нетанјаху зборуваше пред Белата куќа и рече дека Трамп ќе одлучи во следните две недели дали да се придружи на воената кампања на Израел против Иран.