Израелските сили убија најмалку 40 Палестинци во Појасот Газа и наредија нови евакуации, изјавија медицински лица и жители, откако Израел и Иран се согласија на прекин на огнот.
Израелско-иранскиот договор за прекин на огнот, објавен од американскиот претседател Доналд Трамп, ги зголеми надежите кај Палестинците за крај на војната во Појасот Газа, која трае повеќе од 20 месеци.
„Доста! Целиот универзум нè изневери. Хезболах постигна договор без Газа, а сега Иран го стори истото“, рече Абдел Фарук (62) од градот Газа.
„Се надеваме дека Газа е следна“, изјави тој за Ројтерс преку апликација за разговор.
Тој ја даде изјавата пред да одекнат две експлозии во Техеран, а Трамп ги обвини двете страни за кршење на договорот за прекин на огнот, особено критикувајќи го Израел.
Страдање во близина на центрите за дистрибуција на храна
Во меѓувреме, насилството во Појасот Газа продолжува без прекин.
Марван Абу Насер, од болницата Ал-Авда во Нусејрат во централниот дел на Појасот Газа, рече дека примил 19 мртви и 146 повредени од групи луѓе кои се обидувале да стигнат до блиските центри за дистрибуција на храна, управувани од Хуманитарната фондација за храна (GHF), поддржана од САД.
Абу Насер рече дека жртвите биле убиени во пукањето.
Израелската војска соопшти дека во текот на ноќта идентификувала група луѓе во близина на силите што дејствуваат во коридорот Нецарим и дека ги проучува извештаите за жртви.
„GHF“ во е-пошта до Ројтерс изјави дека немало инциденти во близина на центарот за дистрибуција на храна, кој се наоѓа неколку километри јужно од коридорот Нецарим.