Google се соочува со жалба за монопол во Европската Унија за својот модел AI Overviews, поднесена од група независни издавачи.
Тие, исто така, побараа привремена мерка за да се спречи наводна непоправлива штета, според Ројтерс.
AI Overviews се резимеа генерирани од вештачка интелигенција кои се појавуваат над традиционалните врски до релевантни веб-страници и се достапни за корисниците во повеќе од 100 земји. Во мај минатата година, компанијата во сопственост на Alphabet започна да вметнува реклами во функционалноста.
Инвестицијата на Google во интегрирање на вештачката интелигенција во пребарувањето се нарекува еден од неговите најголеми проекти од страна на аналитичарите, но овој потег предизвика загриженост кај некои креатори на содржини, првенствено кај издавачите.
Документот на Здружението на независни издавачи, датиран на 30 јуни, е жалба до Европската комисија, во која се тврди дека Google ја злоупотребува својата пазарна моќ во областа на интернет пребарувањето.
„Основната услуга за пребарување на Google злоупотребува содржина од веб за да прикажува резимеа со вештачка интелигенција во рамките на пребарувањето, што предизвикало и продолжува да предизвикува значителна штета на издавачите – вклучувајќи ги и медиумите – преку изгубен сообраќај, читателска публика и приходи“, се наведува во документот.
Исто така, се истакнува дека Google ги поставува своите резимеа со вештачка интелигенција на врвот од општата страница со резултати од пребарувањето за да прикажува свои резимеа, генерирани со користење на материјал од издавачот, со што оригиналната содржина е ставена во неповолна положба.
„Издавачите кои се потпираат на Google Search немаат можност да ја исклучат својата содржина од процесот на обука на големите јазични модели на вештачка интелигенција на Google и/или од индексирање за резимеа без да го изгубат своето присуство во општите резултати од пребарувањето“, се предупредува во жалбата.
Европската комисија не сакаше да коментира за случајот, а жалбата е испратена и до британскиот регулатор.
На веб-страницата на Здружението на независни издавачи се наведува дека станува збор за непрофитна заедница која ги претставува интересите на издавачите, но нејзините конкретни имиња не се наведени.
Движењето за отворен веб – кое ги обединува дигиталните огласувачи и издавачи – и британската непрофитна организација „Фоксглоув Легал Комунити Интерес Компани“, која се залага за фер игра во технолошкиот сектор, се исто така меѓу потписниците на жалбата.
Потписниците тврдат дека привремената мерка е неопходна за да се спречи сериозна и непоправлива штета на пазарната конкуренција и да се зачува пристапот до информации.
Од друга страна,Google изјави дека многу тврдења за сообраќајот преку пребарување често се базираат на нецелосни и погрешно протолкувани податоци.