Прелетите на беспилотни летала над неколку аеродроми во Данска се чини дека се дело на професионалци, но нема докази дека Русите стојат зад нив, велат властите на земјата.
„Ова е хибриден напад“, изјави министерот за одбрана Троелс Лунд Поулсен на прес-конференција.
„Некој искусен“ стои зад ова, додаде тој.
Тој исто така рече дека беспилотните летала биле лансирани „локално“, што значи во близина на аеродромите, и дека е во тек полициска истрага.
Одлуката да не се соборуваат беспилотните летала е донесена поради безбедноста на населението, се вели во соопштението.
Поулсен рече дека нема докази за руска вмешаност, но дека данските власти го покренале прашањето со НАТО и дека се разгледува можноста за користење на Член 4 за свикување состанок.
Данската национална полиција го зголеми нивото на тревога.
Аеродромите во главните градови на Данска и Норвешка, Копенхаген и Осло, беа привремено затворени на 22 септември.
„Ова е најсериозниот напад врз критичната инфраструктура на Данска досега“, изјави тогаш данската премиерка Мете Фредериксен.
Неодамна, сомнителни дронови беа забележани и над Германија и Шведска.
Се сомнева, но не е докажано, дека тие се дел од таканаречените активности на Русија во „сивата зона“, насочени кон „казнување на западните земји“ што ја поддржуваат Украина.
Европските претставници сега размислуваат за заеднички одговор на растечкиот проблем, за кој данскиот министер за правда, Петер Хамелгард, вели дека е „нешто што ќе остане“.
„Во моментов не исклучуваме никаква можност за тоа кој би можел да стои зад нападите, кои имаат за цел да внесат страв и заплашување и кои водат до поделби во општеството“, додаде министерот.