Милорад Додик им се заблагодари на претседателот на САД и неговите соработници за, како што тврди, “исправката на големата неправда нанесена врз Република Српска, нејзините претставници и нивните семејства со укинување на санкциите – неправда создадена од администрациите на Обама и Бајден”.
Додик изјави дека одлуката за укинување на санкциите не е само правна, туку и морална рехабилитација на вистината за Република Српска и сите што ѝ служат чесно.
„Уште еднаш се покажа дека сè што беше кажано против нас беше лага и пропаганда, врз која беше изграден големиот хаос создаден од Кристијан Шмит – хаос што сега мора да се исчисти“, напиша Додик на платформата X и нагласи:
„Можам да им простам на оние што се фалеа и веруваа во туѓите лаги овие години, освен годините што ги изгубивме затоа што веруваа дека Република Српска ќе падне. Денес е јасно – таа никогаш нема да падне.“