Технолошки експерти, лидери во индустријата и партнери од целиот свет се собраа на 10-тата конференција Huawei Connect Europe во Мадрид за да дискутираат за тоа како вештачката интелигенција (ВИ) и другите технологии ја забрзуваат дигиталната и зелена транзиција на Европа под темата „Цела интелигенција, позелена Европа“.
Според проценките на експертите, вредноста на секторот за ВИ ќе порасне на повеќе од 22 милијарди долари во следните пет години, но примената на ВИ бара избор на сигурна инфраструктура и соодветни решенија.
Дејвид Ванг, извршен директор на Управниот одбор на Huawei, нагласи дека „интелигентниот свет се приближува побрзо отколку што очекувавме“.
„ВИ, 5G и зелената енергија ќе го трансформираат образованието, здравството, финансиите, производството и речиси сите индустрии. Овие технологии ќе создадат безброј можности за раст преку трансформирање на деловната логика, моделите на услуги и целите синџири на вредност. Само во следните пет години, ВИ ќе придонесе со 22,3 милијарди долари во глобалната економија“, рече Ванг.
Панелот истакна дека следната деценија е клучна за двојната транзиција на Европа – и дигитална и зелена – и дека Huawei останува посветена на својата стратегија „во Европа, за Европа“. Компанијата се потпира на мрежа од истражувачки центри, лаборатории за иновации, производствени погони и центри за снабдување за да ги поттикне локалните иновации и да им помогне на европските клиенти да го забрзаат својот премин кон дигитални и одржливи бизниси, објави Банкар.
Лео Чен, виш потпретседател и претседател на корпоративна продажба во Huawei, ја истакна поддршката преку три клучни столба: технолошки иновации, партнерство и развој на таленти.
Како пример за практични решенија, Huawei го претстави HUAWEI eKit 4+10+N SME Intelligence Solutions – пакет дизајниран за четири сценарија: интелигентна канцеларија, бизнис, образование и здравствена заштита – олеснувајќи го усвојувањето на нови технологии од страна на малите и средни претпријатија во градењето на интелигентен екосистем.
За соработка со локалните партнери, компанијата го претстави SHAPE 2.0, подобрена рамка за партнерство и план за развој што им овозможува на дистрибутерите да обезбедат решенија врз основа на реалните потреби на клиентите. Huawei продолжува да инвестира во развој на таленти преку Huawei ICT Academies, заеднички лаборатории и програми за сертификација.
Настанот, исто така, собра бројни експерти и претставници на институции кои ги споделија своите искуства и визии, а заклучокот од конференцијата е јасен: комбинацијата од вештачка интелигенција, 5G и зелена енергија отвора конкретни можности за раст и трансформација. За овие можности да бидат одржливи, потребна е локална соработка, инвестиции во таленти и практични решенија што го премостуваат јазот помеѓу иновациите и примената.