Српскиот претседател Александар Вучиќ ги повика Дијана Хрка, мајката на една од 16-те жртви на инцидентот во Нови Сад, и пратеникот на Српската напредна партија (СНС) Углеша Мрдиќ да ги прекинат штрајковите со глад, стана јасно во објава на Инстаграм.
„Ги замолив да го прекинат штрајкот со глад и ја поканив г-ѓа Хрка во претседателството на состанок… и се надевам дека ќе донесат одлука за прекин на штрајкот“, напиша Вучиќ на својот профил и прецизираше дека разговарал со двајцата по телефон.
Дијана Хрка нема намера да се откаже и ќе продолжи со штрајкот сè додека институциите не почнат да си ја работат својата работа, објави регионалната телевизија N1.
Таа го започна штрајкот со глад на 2 ноември затоа што, како што рече тогаш, една година по уривањето на бетонската настрешница на железничката станица во Нови Сад, каде што загинаа 16 лица, а едно беше тешко повредено, никој не е осуден, а случајот дури и не е започнат.
Мрдиќ, пратеник од владејачката СНС, започна штрајк со глад на 31 октомври и исто така одбива да го прекине сè додека обвинителството не ги земе предвид доказите што тој ѝ ги доставил во истрагата за трагедијата во Нови Сад, поврзана со високи функционери во компанијата „Инфраструктура на српските железници“.
Утрово, Миломир Јачимовиќ, сопственикот на автобусот што ја превезе Дијана Хрка од Нови Сад до Белград на 2 ноември, исто така најави штрајк со глад.
Јачимовиќ штрајкува затоа што сака да му бидат поништени казните за нарушување на јавниот ред и мир и нелегално паркирање. Полицијата, исто така, ги заплени сите автобуси во сопственост на Јакимовиќ и ги проверува.
Јакимовиќ го постави својот шатор во Нови Сад пред зградата на владата во автономната српска покраина Војводина.
Тој за N1 изјави дека неговиот 16-годишен син ќе му се придружи во штрајкот.
Во последните месеци, Јакимовиќ бесплатно превезува граѓани и студенти на антивладини протести низ цела Србија, објавија локалните медиуми.