Конечниот договор за завршување на војната во Украина е 90% готов, објави украинскиот претседател Володимир Зеленски во своето новогодишно обраќање. „Остануваат 10 проценти. Овие 10 проценти содржат сè, тие ќе одлучат за судбината на мирот, судбината на Украина и Европа и како ќе живеат луѓето“, рече Зеленски. Според него, Киев сака војната да престане, но не по секоја цена и тој нема да потпише „ранлив“ договор.
Украинскиот Генералштаб пријави руско гранатирање на цивилната инфраструктура во регионот Одеса. Ситуацијата на фронтот во клучниот град Покровск останува најнапната.
Најмалку 5 украински беспилотни летала што летаа кон Москва беа соборени од руската воздушна одбрана, објави градоначалникот на главниот град, Сергеј Собјанин. Некое време, активностите на еден од четирите главни аеродроми во Москва – Домодедово – беа ограничени.
Американската Национална безбедносна агенција утврди дека Украина не ја нападнала резиденцијата на рускиот претседател Владимир Путин со дронови, пишува американскиот весник „Волстрит \урнал“. Агенцијата Ројтерс забележува дека сè уште не ја потврдила независно оваа информација.
Русија во понеделникот објави дека Украина ја нападнала резиденцијата на рускиот шеф на државата во Валдај со 91 дрон со долг дострел. Киев го нарече ова тврдење „лага“ и ја обвини Москва дека го користи како изговор за саботирање на мировните преговори.