Новата програма за субвенции за електрични возила на германската влада од 3 милијарди евра (3,1 милијарди долари), која трае до 2029 година, има доволно средства за околу 800.000 електрични возила, изјави министерот за животна средина Карстен Шнајдер, според Блумберг.
Шнајдер, кој треба да ги презентира деталите за шемата – наменета за домаќинства со ниски и средни приходи – на прес-конференција подоцна во петок, изјави за весникот „Билд“ дека владата ќе обезбеди субвенции од 1.500 до 6.000 евра, во зависност од возилото, големината и приходите на семејството.
Се очекува онлајн порталот за обработка на апликациите да биде лансиран во мај, објави „Билд“. „Ова е поттик за нашата домашна автомобилска индустрија“, рече Шнајдер.
Владејачката коалиција на канцеларот Фридрих Мерц ја претстави програмата во октомври како дел од пошироките напори за поддршка на производителите на автомобили во земјата кои се борат со кризата.
Мерц беше една од движечките сили зад кампањата насочена кон принудување на Европската Унија (ЕУ) да се откаже од забраната за продажба на автомобили со мотори со внатрешно согорување и да им даде на производителите поголема флексибилност во транзицијата кон помалку загадувачки транспорт.
Фото: Принтскрин/ДВ
Неговата влада, исто така, го продолжи ослободувањето од данок за електрични возила до 31 декември 2035 година, што според Министерството за финансии се очекува да чини околу 600 милиони евра изгубени приходи до 2029 година.
Во Германија, електричните автомобили имаат значително повисока цена отколку во Кина и на други места во Европа. Анализата на Центарот за автомобилски истражувања (CAR) во Бохум покажува дека за 30 споредливи електрични модели, германските купувачи плаќаат во просек 47% повеќе од потрошувачите во Кина.
Додека просечната цена за електричен автомобил во Кина е 29.765 евра, во Германија таа е 43.749 евра за истите автомобили. Оваа пресметка не го зема предвид данокот на додадена вредност (ДДВ) или какви било привремени попусти на цените.
Споредбата, исто така, покажува дека просечната цена на европските брендови во Кина е 43.004 евра, додека во Германија е 58.844 евра. Просечната цена на автомобилите Tesla во Кина е 26.861 евра, додека потрошувачите во Германија плаќаат 33.168 евра за американскиот бренд.