Европското здружение на производители на автомобили (ACEA), кое претставува 17 големи европски производители на автомобили, комбиња, камиони и автобуси, ги објави своите најнови резултати од продажбата (регистрациите) во ЕУ за првиот месец од 2026 година.
Во јануари 2026 година, регистрациите на нови автомобили во ЕУ се намалија за 3,9 проценти во споредба со јануари минатата година, што претставува втор последователен предизвикувачки почеток на годината за пазарот.
Пазарниот удел на возилата на батерии (BEV) достигна до 19,3 проценти, што го истакнува континуираниот потенцијал за понатамошен раст. Хибридните електрични возила (HEV) се во водечка позиција како најпопуларен избор на тип на погон кај купувачите, додека хибридите со приклучок (PHEV) ја консолидираат својата позиција на пазарот, нагласувајќи ја важноста на технолошки неутралниот пат кон декарбонизацијата.
Автомобилите на батерии учествуваа со 19,3 проценти од пазарниот удел на ЕУ во јануари 2026 година, што е зголемување во однос на ниската почетна вредност од 14,9 проценти претходната година. Регистрациите на хибридни електрични автомобили учествуваа со 38,6 проценти од пазарот, останувајќи префериран избор кај потрошувачите во ЕУ. Истовремено, комбинираниот пазарен удел на бензинските и дизел автомобилите падна на 30,1 процент, од 39,5 проценти во јануари 2025 година.
Во јануари 2026 година беа регистрирани 154.230 нови автомобили на батерии, што претставува дел од гореспоменатите 19,3 проценти од пазарниот удел на ЕУ. Четирите најголеми пазари на ЕУ, кои заедно сочинуваат 60 проценти од регистрациите на автомобили на батерии, постигнаа мешани резултати: Франција (+52,1 процент) и Германија (+23,8 проценти) забележаа силен раст, додека Белгија (-11,5 проценти) и Холандија (-35,4 проценти) доживеаа пад.
Податоците за јануари 2026 година, исто така, покажаа зголемување на регистрациите на нови хибридни електрични автомобили во ЕУ на 308.364 единици, поддржани од растот во Италија (+24,9 проценти) и Шпанија (+9 проценти), додека Франција остана стабилна. Заокружувајќи ги четирите главни пазари, Германија забележа пад од 1,8 проценти во споредба со јануари 2025 година. Севкупно, хибридно-електричните модели учествуваа со 38,6 проценти од вкупниот пазар на ЕУ.
Регистрациите на „Plug in“ хибридни електрични автомобили продолжија да покажуваат силен раст, достигнувајќи 78.741 единици во првиот месец од 2026та година. Ова беше поттикнато од растечкиот обем на клучните пазари како што се Италија (+134,2 проценти), Шпанија (+66,7 проценти) и Германија (+23 проценти). Како резултат на тоа, новите „Plug in“ хибридни електрични автомобили сега претставуваат 9,8 проценти од регистрациите во ЕУ, во споредба со 7,4 проценти во јануари минатата година.
Во јануари 2026 година, регистрациите на бензински автомобили се намалија за 28,2 проценти, при што сите поголеми пазари пријавија пад. Франција забележа најголем пад, каде што бројот на регистрации паднаа за 48,9 проценти, по што следуваат Германија (-29,9 проценти), Италија (-25,5 проценти) и Шпанија (-22,5 проценти).
Со 175.989 нови автомобили регистрирани минатиот месец, пазарниот удел на бензинските автомобили падна на 22 проценти од 29,5 проценти истиот месец минатата година. Пазарот на дизел автомобилите го продолжи трендот на опаѓање, при што регистрациите се намалија за 22,3 проценти и сочинувале 8,1 процент од регистрациите на нови автомобили минатиот јануари.