Британската полиција веќе прави проценки дали Епштајн користел приватни летови за трговија со жени преку два лондонски аеродроми и еден во централна Англија, како дел од национално координирана истрага за врските на озлогласениот финансиер со Велика Британија, објави Ројтерс.
Меѓутоа сè погласни се повиците полицијата да истражи дали базите на Кралските воздухопловни сили (RAF), како што се Мархам во источна Англија и Нортхолт во близина на Лондон, биле користени за истата цел.
Повиците дојдоа откако се појавија извештаи дека приватниот авион на Епштајн исто така слетувал таму.
Додека приватните авиони најчесто ја користат базата RAF Нортхолт, слетувањата во RAF Мархам, клучна воена база, се многу поретки.
Министерот за одбрана Џон Хили нареди проверка на евиденцијата за воените летови, изјави портпаролот на Министерството за одбрана доцна во четвртокот.
„Министерот за одбрана нареди преглед на сите евиденции што Министерството можеби ги има за летовите на Епштајн што слетуваат во базите на RAF, за да се осигура дека сите информации поврзани со неговите злосторства се откриени и доставени до надлежните органи“, изјави портпаролот.
Во соопштението се додава дека Министерството за одбрана ќе поддржи било какви истраги на цивилната полиција, додавајќи дека „мислите на Министерството се со жртвите на гнасните злосторства на Епштајн“.
Речиси седум години по неговата смрт, скандалите со Епштајн продолжуваат да го потресуваат британскиот естаблишмент.
Последната серија документи објавени во јануари оваа година доведоа до апсења на Ендру Маунтбатен-Виндзор, брат на кралот Чарлс, и Питер Манделсон, поранешниот британски амбасадор во САД, под сомнение дека споделувале доверливи владини документи со Епштајн.