„На Блискиот Исток, кој е разорен од војна, Европската Унија го засилува својот одговор, додека другите се повлекуваат“, изјави Хаџа Лахиб, комесар на ЕУ за хуманитарна помош.
Во Сирија, 210 милиони евра хуманитарно финансирање од ЕУ ќе поддржат итни интервенции и заштита на населението низ целата земја.
„Повеќе од една година по падот на режимот на Асад во декември 2024 година, дури 16,5 милиони луѓе сè уште имаат потреба од хуманитарна помош. Меѓу нив се повеќе од 3,2 милиони повратници кои се соочуваат со уништена инфраструктура и недостаток на можности за приходи. Финансирањето ќе опфати помош во храна, здравствена заштита, засолниште, пристап до чиста вода и образование за децата кои не одат на училиште“, соопшти Европската комисија.
Во Палестина, 124 милиони евра ќе бидат издвоени за помош во храна, здравствени услуги, заштита, засолниште и образование кои го обезбедуваат хуманитарни партнери кои работат во исклучително тешки услови. Повеќе од 3,3 милиони луѓе сè уште имаат потреба од помош, вклучувајќи 2,1 милион во Газа и 1,2 милиони на окупираниот Западен Брег. Во Газа, цивилите се соочуваат со неухранетост, колапс на здравствениот систем и систематско нарушување на испораката на хуманитарна помош, велат оттаму.
Во Либан, 100 милиони евра ќе бидат наменети за итна здравствена заштита, основна помош за семејствата кои се осиромашени, услуги за заштита, засолниште и образование за децата кои не одат на училиште. Хуманитарните потреби во земјата се исклучително високи: дури и пред сегашната криза, влошена од неодамнешните случувања во Иран, повеќе од три милиони луѓе во Либан веќе имаа потреба од хуманитарна помош. Во март 2026 година, израелските воздушни напади раселија повеќе од 800.000 луѓе. Хуманитарните летови на ЕУ за воздушен превоз веќе доставуваат медицинска опрема и друга помош на терен.
Во Јордан, 15,5 милиони евра помош ќе бидат насочени кон одржување на основните услуги, како што се здравствената заштита и поддршка на бегалците во и надвор од камповите.
Во Египет, 8 милиони евра ќе поддржат мултисекторска помош за најранливите, вклучувајќи квалитетно образование за децата кои не одат на училиште, како и регионална програма за подготвеност за катастрофи. Египет во моментов е домаќин на повеќе од 1,5 милиони бегалци и баратели на азил, главно од Судан и Газа.