По низа перипетии, Икс фактор конечно дојде до бројката од 8 финалисти. Оваа сезона навистина секоја епизода носеше свое изненадување. Враќањето на голем број натпреварувачи донесе потреба од две, наместо една емисија во неделата, со голем број настапи и веројатно мал фокус на менторите. Но, сепак, откако вчера си заминаа дури четворица одеднаш, полуфиналистите за оваа сезона се: Магдалена, Антонио, Аднан и Тарик, Боби, Амел, Хајвеј Трио, Најн контрол и Ива.
Веројатно е нормално да има нелогичности во шоуа каде одлучува изборот на гледачите, но годинава има голем број на реакции од публиката на сметка на жирито, кое на неколку пати не сакаше да заземе став и оставаше публиката да одлучи за судбината на учесниците, а и со своите воедначени коментари не носеше суд и не даваше сугестија на публиката кој е навистина подобар. Така уште во првите емисии си заминаа натрпеварувачи кои очигледно имаа далеку поголеми вокални способности, а остануваат и натаму да се борат за финалето просечни изведувачи. Веројатно еден од аргументите е и дека претежно тинејџерската публика е активна во гласањата, но епилогот е многу неизвесен. Можеби на крајот победата ќе падне навистина во рацете на изведувач со Икс фактор, а можеби ќе добиеме победник кој набрзо ќе остане заборавен.
