Откако сме усмено известени од судот дека издавањето потврди за неосудуваност за кандидатите за пратеници од Либералната партија нема да биде во можност да биде завршено во законски потребните рокови, Либералната партија се обрати до Државната изборна комисија со следното известување:
„Ве известуваме дека во текот на денешниот ден наидуваме на проблем во издавањето на потврдите за неосудуваност на кандидатите за пратеници од Либералната партија.
Конкретно, при доставата на документите, усмено сме известени дека надлежниот суд Скопје 1 Скопје веројатно нема да биде во можност да ги издаде потребните документи во следните 7 дена.
Предупредуваме дека со тоа државата ќе спречи регистрирана политичка партија, во конкретниот случај – Либералната партија – да поднесе кандидатски листи за претстојните парламентарни избори.
Оттука, навремено Ве алармираме да ги преземете сите мерки да не ни се прават административно-политички пречки – нам и на другите партии кои ќе настапуваат самостојно на изборите.
Знаеме дека сте избрани со политичка поддршка на само четири партии, но одговарате пред Уставот и законот во Република Македонија.“
Претседателот на Либералната партија, Ивон Величковски, по овој повод изјави: Нема да дозволиме државата узурпирана од четири партии да не спречи во правото на политичко дејствување и остварувањето законски права. Знаеме дека сме им проблем, затоа што не сакаме да играме по туѓи ноти. Ги известуваме и сите амбасади за овие опструкции. Сакавте Пржино? Сега спроведете го на дело.