Голема меѓународна студија сугерира дека од пандемијата има нагло зголемување на, како што се нарекува, „проблематично“ користење на социјалните медиуми кај младите, јавува Би-Би-Си.
Истражувачите од европскиот огранок на Светската здравствена организација (СЗО) дошле до овој заклучок откако анкетирале речиси 280.000 деца на возраст од 11, 13 и 15 години во 44 земји.
Студијата за здравственото однесување на децата на училишна возраст покажа дека просечно 11 отсто од испитаниците ги користеле социјалните медиуми на проблематичен начин во 2022 година, во споредба со седум отсто во 2018 година.
Авторите на извештајот велат дека резултатите „покренуваат загриженост за влијанието на дигиталната технологија врз менталното здравје и благосостојбата на младите во Европа“.
„Проблематичната употреба е најчеста кај 13-годишните, максимум во раната адолесценција и е поверојатно да ја пријават девојчињата отколку момчињата“, рече меѓународниот координатор на студијата, д-р Џо Инчли од Универзитетот во Глазгов.
Таа рече дека истражувањето открило и колку време младите поминуваат на интернет.
„Во текот на целата студија, откривме дека нешто повеќе од една третина од адолесцентите велат дека се во постојан онлајн контакт со пријателите и другите. Тоа значи дека тие се поврзани речиси цел ден“, додаде таа.
Сепак, извештајот не заклучува дека времето поминато на Интернет е секогаш штетно. Тинејџерите кои се чести корисници на социјалните мрежи пријавија посилна врсничка поддршка и социјални врски.
За „проблематичното“ малцинство, беше откриено дека употребата на социјалните мрежи е поврзана со симптоми слични на зависност, кои вклучуваат занемарување други активности во корист на трошење време на социјалните мрежи, вклучување во расправии и лажење за тоа колку време поминуваат на интернет и неможноста да се воспостави самоконтрола.
Студијата, исто така, ја нагласува загриженоста за процентот на тинејџери кои се сметаат за изложени на ризик од „проблематично играње видео игри“, што е почеста кај момчињата отколку кај девојчињата.
Д-р Ханс Клуге, регионален директор на СЗО за Европа, рече дека резултатите јасно покажуваат дека социјалните медиуми можат да имаат и позитивни и негативни последици за младите луѓе.
Тој рече дека е потребно повеќе образование за дигитална писменост за да им се помогне на младите да развијат здрав пристап до интернет.
„Јасно е дека ни треба итна и одржлива акција за да им помогнеме на адолесцентите да ја избегнат штетната употреба на социјалните медиуми, за која се покажа дека води до депресија, малтретирање, анксиозност и слаби академски перформанси“, рече тој.