Американското Министерство за трговија најави воведување тарифи до 3521% за увоз на соларни панели од четири земји од Југоисточна Азија – Камбоџа, Тајланд, Малезија и Виетнам. Одлуката доаѓа по истрагата започната минатата година, кога некои од најголемите производители на соларна опрема побараа од администрацијата на тогашниот претседател Џо Бајден да го заштити нивното работење во САД.
Предложените царини беа воведени како одговор на обвинувањата дека Кина ги субвенционира производителите и наводно исфрла неправедно евтини производи на американскиот пазар. Одлука за конечните царини ќе донесе Американската меѓународна трговска комисија во јуни.
Драстични разлики во висината на царините
Тоа се компензаторни и антидампинг давачки кои варираат во зависност од производителот и земјата на потекло на производот. Некои извозници од Камбоџа се соочуваат со највисоки царини, до 3521%, поради, според Министерството за трговија, недостаток на соработка во текот на истрагата.
Спротивно на тоа, соларните панели произведени во Малезија од кинеската „Jinko Solar“ се предмет на меѓу најниските тарифи, нешто повисоки од 41%. Друг кинески производител, „Trina Solar“, се соочува со царина од 375% за производите што ги произведува во Тајланд.
Двете компании одбија да го коментираат случајот за Би-Би-Си.
Во последниве години, многу кинески компании го преселија производството во Југоисточна Азија за да ги избегнат царините наметнати од Трамп на почетокот на неговиот прв претседателски мандат. Најновите наоди на Министерството за трговија беа поздравени и од Комитетот за трговија на Американската алијанса за производство на сончева енергија, група американски производители кои побараа истрага.
„Ова е одлучувачка победа за американската индустрија и потврда на она што долго време го расправавме: дека кинеските соларни компании го мамат системот“, рече Тим Брајтбил, главен правен советник на организацијата. Во текот на 2023 година, САД увезле соларна опрема во вредност од речиси 12 милијарди долари (околу 11,2 милијарди евра) од четири азиски земји, покажуваат податоците на американското биро за статистика.
Можни поскапувања за потрошувачите
Иако тарифите ќе им помогнат на домашните производители, тие исто така може да доведат до повисоки трошоци за бизнисите и потрошувачите кои имаат корист од поевтината соларна технологија. Новите мерки се воведуваат покрај постојните тарифи кои претходно беа воведени од администрацијата на Трамп.
Најавата доаѓа само неколку дена откако кинескиот претседател Си Џинпинг ги посети Виетнам, Малезија и Камбоџа во обид да ги зајакне врските со регионот и да ги повика тие земји да се спротивстават на, како што рече, „едностраното малтретирање“ од страна на САД.
Трамп досега воведе царини до 145 отсто на кинескиот увоз, а сите други земји во моментов подлежат на општа царина од 10 отсто што останува на сила до јули. Неговата администрација минатата недела објави дека вкупните царини за некои кинески производи, при додавање на постоечките и новите, би можеле да достигнат 245%.
Кина одговори со царина од 125 отсто за американските производи и рече дека „ќе се бори до крај“.