Американскиот технолошки гигант Интел најави дека во Германија ќе изгради голем комплекс за производство на чипови. Најавено е дека ова е прва фаза од планираните инвестиции во Европа, кои во следните десет години треба да достигнат 88 милијарди долари.
Првата фаза предвидува 33 милијарди евра инвестиции, вклучително и 17 милијарди евра за фабрики во Германија, кои треба да ја задоволат растечката побарувачка за чипови за компјутери, автомобили, паметни телефони и други уреди и да ја намалат зависноста на Европа од азиските добавувачи на долг рок.
Изградбата на две фабрики во Магдебург, Германија, ќе отвори 7.000 работни места во градежништвото, 3.000 постојани работни места за сопствени потреби и уште десетици илјади работни места со добавувачи и партнери, се наведува во извештајот.
Ќе инвестира дополнителни 12 милијарди евра во фабрики во Ирска, со што вкупната инвестиција на Интел во таа членка на ЕУ ќе достигне повеќе од 30 милијарди евра.
Интел преговара и со Италија, за потенцијална инвестиција до 4,5 милијарди евра во инженерски центар за поддршка на производството на чипови, кои планираат да го отворат меѓу 2025 и 2027 година.
Во Франција, Интел планира да го изгради својот нов европски истражувачки центар, кој ќе отвори 1.000 нови високотехнолошки работни места.
Изборот падна на тие локации откако некои влади во ЕУ, вклучително и италијанската, на американскиот гигант му понудија големи стимулации за да ги привлечат неговите инвестиции, пишува Ројтерс.