Американскиот потпретседател Џ.Д. Венс го искористи својот говор на Минхенската безбедносна конференција за да ја критикува Европа за наводно задушување на слободата на говорот.
Како пример, меѓу другото ги наведе неодамна откажаните претседателски избори во Романија. Тој ја критикуваше и Европската комисија и нејзината политика за регулирање на социјалните мрежи. Тој, исто така, го повтори барањето на САД европските земји да ги зголемат трошоците за одбрана.
„Ако американската демократија може да преживее десет години критики од Грета Тунберг, можете да преживеете неколку месеци од Илон Маск, но она што не може да го преживее ниту една демократија, без разлика дали е американска, германска или европска, е да им се каже на милиони гласачи дека нивните мисли и грижи, нивните желби, нивните барања за олеснување се невалидни или недостојни да се разгледуваат“, рече Венс.
Тој додаде дека лидерите на ЕУ не можат да им избегаат на сопствените гласачи.
„Ако бегате од страв од сопствените гласачи, Америка не може да направи ништо за вас, а кога се сведува на тоа, не можете ни вие ништо да направите за американскиот народ, кој ме избра мене и го избра претседателот Трамп“, им порача Венс на европските лидери во Минхен.
Според американскиот потпретседател, иако е важно Европа да ги развие своите надворешни одбранбени капацитети, тој додаде дека повеќе го загрижува опасноста што, според него, и се заканува на Европа одвнатре.
Венс стравува дека „Европа би можела да се откаже од некои од основните вредности, вредности што ги споделува со Соединетите држави“.
„Мораме да направиме повеќе од само да зборуваме за демократските вредности, мораме да ги живееме“, додаде вториот највисок функционер во администрацијата на претседателот Доналд Трамп. Таа администрација, меѓу другото, им забранува на новинарите на АП да излегуваат на прес-конференции во Белата куќа, бидејќи тие одбиваат да го наречат Мексиканскиот Залив Американски Залив.
Венс се осврна и на миграцијата, осврнувајќи се на нападот во Минхен, извршен во четвртокот од 24-годишен авганистански барател на азил.
„Колку пати мораме да ги претрпиме овие ужасни неуспеси пред да го промениме курсот и да ја насочиме нашата заедничка цивилизација во нова насока“, праша американскиот потпретседател?
Спротивно на очекувањата, за време на својот говор на безбедносната конференција, Венс ја заобиколи темата Украина и не зборуваше многу за безбедносните прашања. Првично се очекуваше Венс да го искористи својот говор во Минхен за да ги претстави плановите на Соединетите Држави под претседателот Доналд Трамп за ставање крај на војната во Украина.