Две девојчиња од Данскa се меѓу шесте туристи кои починаа по сомнително труење со метанол во Лаос. Ана-Софи Оркилд Којман (20) и нејзината пријателка Фреја Венервалд (21) наводно испиле отровен пијалок и повраќале крв дури 13 часа пред да умрат.
Тие биле на патување од соништата низ Југоисточна Азија, објави „Дејли Мејли“. Тие се меѓу шесте туристи кои починаа во последните недели по посетата на Ванг Виенг во Лаос.
Се верува дека девојчињата умреле откако испиле алкохолни пијалоци прелиени со метанол, смртоносна хемикалија која понекогаш им се служи на туристите наместо етанол со сооветен квалитет.
Меѓу загинатите по трагичното масовно труење што се случи околу 12 ноември е и една Британка. Ана-Софи и Фреја, по потекло од Роскилде, западно од Копенхаген, беа страствени патници. Тие ги посетија Италија и Унгарија минатата година пред да заштедат за патување во Азија. По пристигнувањето во Лаос, тие го резервираа хостелот „Nana Backpackers“.
Недолго откако на девојките од Данска им се слошило, маж кој имал заеднички пријател со нив објавил итно предупредување на интернет за другите патници.
„Последниве неколку дена бев зафатен со еден белгиски пријател барајќи ги двете девојки со кои патуваше. Повеќе од 72 часа не можеше да се оствари никаков контакт со нив. Чудното беше што нивната последна порака беше дека и двете повраќале крв 13 часа. Оттогаш и двете починале“, напиша тој.
Според извештаите на медиумите, девојките пиеле во барот на хостелот пред да одат во други локални барови на 12 ноември. Во хотелот се вратиле околу полноќ, а следниот ден го поминале во бањата. На крајот, на 13 ноември околу 18 часот биле пронајдени во бессознание на подот во бањата.
Девојките се пренесени во болница и двете во кома. Тие беа прогласени за мртви на 14 ноември.
Владата на Лаос соопшти дека е длабоко тажна поради смртта на туристите и дека го истражува наводното масовно труење.