Австралиската влада нуди еднократна финансиска помош за да им помогне на сите оние кои сакаат да да ги напуштат своите насилни партнери.
Жртвите можат да аплицираат за исплата на 5.000 австралиски долари (3.700 американски долари) од вторник, а помошта вклучува готовина и директни плаќања за трошоци како што се школарина за деца.
Новата владина мерка е отворена и за жени и за мажи. Како и да е, жените се очекува да го сочинуваат мнозинството, во земјата каде што една жена умира од рацете на својот партнер на секои девет дена, според австралиските власти.
Поддржувачите на оваа програма го поздравија почетокот на плаќањата, но многумина тврдат дека основните причини за семејно насилство во Австралија нема да се решат со такви мерки.
Мери Крукс, извршен директор на Викторијанскиот фонд за жени, жртви на семејно насилство, вели дека на Австралија и треба многу поширока дебата за мачо културата во општество што ги става мажите на чело на семејството.
Таа исто така прашува зошто баш жените да бидат принудени да го напуштат семејниот дом.
– Овде постои големо морално, етичко и политичко прашање. Зошто баш жената да е таа која треба да помине низ дополнителни трауми и нарушувања на својот живот, кога таа, всушност, не направила ништо лошо? Зошто мора таа да ги земе децата и да го напушти својот дом, а можеби дури и да не може да добие место во безбедна куќа?
Австралија е лошо рангирана на меѓународно ниво на родова еднаквост.
Извештајот на Светскиот економски форум за глобалните родови разлики за 2021 година ја стави Австралија на 50 -то место, далеку под САД, Велика Британија, Франција и Нов Зеланд.
Разликата во платите од 13,4 проценти во Австралија меѓу мажите и жените е на рекордно ниско ниво, се вели во извештајот на Владата за буџетот за жените во мај, ветувајќи дека ќе продолжи да работи на намалување на разликата.
Сепак, бројките покажуваат дека пандемијата дополнително ја влоши економската нееднаквост во Австралија, бидејќи повеќе жени ги загубија своите работни места отколку мажите или работното време им беше скратено.
Кампањата „Црвено срце“, која ја документира смртта на секоја жена и дете во Австралија убиени со намера, негрижа или занемарување, проценува дека 42 жени се убиени во Австралија од насилни партнери од почетокот на оваа година.