Тројца хаитски полицајци и двајца цивили беа убиени во централен Хаити, каде што насилството меѓу бандите е во пораст, соопштија денес владата и полицискиот синдикат.
Полициските службеници биле членови на специјалната единица „UDMO“ која дејствува кога избувнуваат немири и насилство.
Полицискиот синдикат ја повика владата на Хаити подобро да ги заштити полицајците, кои се закануваат со бунт.
„Владата не им придава никаква важност на полицијата. Доколку ги сфатеа сериозно, ќе обезбедија ресурси и поддршка и за полицијата и за армијата за да се стави крај на оваа несигурност. Премногу полицајци загинаа“, се вели во соопштението.
Преодниот претставнички совет – привремената влада на оваа карипска земја, најсиромашна на северната хемисфера, каде што ситуацијата по политичкиот колапс се влошува секој месец, објави дека ги мобилизира сите потребни ресурси за истрага на убиствата на полицајците.
Хаити е во хаос и беззаконие. Во централниот регион Артибоните и соседните области, повеќе од 1.000 луѓе беа убиени, 213 ранети и 620 киднапирани од октомври минатата година до крајот на јуни оваа година, објави Канцеларијата за човекови права на Обединетите нации.
Полицијата во Хаити ја поддржува полициска мисија на Обединетите нации, претежно кенијска, со мандат да го задушува насилството меѓу бандите, но бандите често се посилни од нив и имаат воено оружје.
Двајца полицајци на ОН од Кенија исто така беа убиени оваа година, двајцата во Артибоните.