Малечко од бела ајкула е видена во близина на Котор. Институтот за морска биологија на Црна Гора објави неколку важни факти за ова животно и разјасни дали има причина за страв.
Рибарот Гојко Митровиќ достави до гореспоменатиот институт фотографии од млада единка на голема бела ајкула, фатена и пуштена на 12 километри од брегот и на длабочина од 115 метри.
Меѓу другото, тие наведоа дека, иако често се верува спротивното, овој вид природно влегува во Јадранското Море и е жител на целиот Медитеран. Сепак, неговиот број е значително помал отколку во минатото.
„Големата бела ајкула (Carcharodon carcharias) е еден од најпознатите животински видови во светот, а нејзината медитеранска популација се смета за критично загрозена. Наодите на овој вид во медитеранските земји станаа многу ретки и често се опишуваат поединечно во научната литература. Според податоците на институтот, во текот на изминатите речиси 30 години, ова е само трет улов на овој вид во нашите води. Најновото откритие на млада единка во Јадранското Море е регистрирано во 2023 година, во соседна Хрватска“, напишаа тие.
Тие исто така објаснија дека нападите од ајкули ретко се случуваат, иако возрасните од овој вид можат да претставуваат потенцијална опасност за луѓето.
„Повеќето луѓе имаат вроден страв од животни кои можат да бидат опасни за нас, што е сосема разбирливо. Сепак, преку соодветни информации, без сензационализам, може да се види дека фреквенцијата на напади од ајкули врз луѓето е значително помала во споредба со многу други животни, дури и некои од оние со кои се среќаваме секојдневно“, објавија тие на социјалните мрежи.