Дерик Роуз феноменот од Чикаго и едно од најпрепознатливите лица на НБА, реши да стави крај на својата професионална кариера, со што ја затвори една од највозбудливите, но и најтажните кошаркарски приказни.
– По 15 сезони во НБА, Дерик Роуз се повлекува од кошарката. „Следното поглавје е за остварување на моите соништа и мојот континуиран раст“, изјави тој за Атлетик:
Инаку, Роуз е роден на 4 октомври 1988 година во Чикаго, а уште од мали нозе покажа исклучителен талент, инспириран од неговиот идол Мајкл Џордан. Неговата кариера започна во гимназијата „Симеон кариерна академија“, каде тренерите и навивачите веќе го сметаа за идна ѕвезда.
По успешното студирање на Универзитетот во Мемфис, Роуз беше избран за прв пик на драфтот во НБА во 2008 година од Чикаго Булс. Во својата дебитантска сезона, тој ја освои титулата дебитант на годината и брзо стана клучен играч за тимот. Неговото искачување го достигна врвот во 2011 година кога беше прогласен за најкорисен играч во лигата, станувајќи најмладиот МВП во историјата на НБА. Неговата брзина, атлетизам и способност да ја контролира играта го направија не само ѕвезда, туку и симбол на надеж за публиката во Чикаго. Интересно е тоа што Роуз и Мајкл Џордан се единствените играчи на Чикаго Булс кои станале МВП на НБА.
Сепак, кариерата на Роуз беше одбележана со бројни повреди, кои често го принудуваа на долги отсуства од терените. Повредите на коленото фрлаат сенка на неговата поранешна слава. Иако покажа неверојатна издржливост, камбекот не беше она на што се надеваа навивачите, а неговиот тимски дух никогаш не изостана.
Во текот на неговата кариера, Роуз играше за повеќе тимови, вклучувајќи ги Њујорк Никс, Кливленд Кавалирс, Минесота Тимбервулвс и Детроит Пистонс. Тој остави свој белег во секој тим, но неговото враќање во Чикаго, каде што се започна, беше емотивен момент за него и неговите навивачи. Иако повредите значително влијаеја на неговата кариера, Роуз остана запаметен како еден од најталентираните плејмејкери во историјата на лигата.
Она што е сигурно, по завршувањето на кариерата останува неговата приказна, а таа ќе остане симбол на борба и страст за кошарката.