Претседателката на Косово, Вјоса Османи, соопшти дека формално побарала од владата на оваа земја, на чело со премиерот Албин Курти, да ги укине сите царини на стоките што се увезуваат во оваа земја од САД.
Османи се огласи на социјалната мрежа Х откако Косово доби царина од 10 отсто од американскиот претседател Доналд Трамп, како дел од неговата најава за воведување царини за речиси сите земји во светот.
„Би било значаен чекор да ги продлабочиме економските врски со нашиот најблизок партнер и да испратиме јасна порака дека Косово е подготвено за уште поцврсти и поопширни односи со САД, со уште појасна визија што ќе ги направи нашите две земји посилни, побезбедни и попросперитетни“, најави Османи.
Исто така, Османи рече дека оваа одлука ќе отвори нови можности за развој на врските меѓу Вашингтон и Приштина.
„Убедена сум дека овој потег ќе отвори нови можности за отворање нови работни места, размена на технологии и долгорочен економски раст. Повеќе од само економски потег, ова е надворешнополитичка цел, која ја потврдува нашата постојана посветеност на косовско-американските односи.
Ова е сојуз изграден врз заедничките вредности на слободата и децениската непоколеблива поддршка“, е пораката на косовската претседателка.